neshare
Mu buzima iyo umeze neza ufite ubuzima bwiza ni isoko y’ibyishimo ndetse bituma ugera ku ntego zawe z’ubuzima. Gusa kugira ubuzima bwiza biraharanirwa kandi ntibisaba ibintu byinshi cyane ahubwo bisaba kwita ku buzima bwawe buri munsi kandi ugakora ibintu bishobora gutuma ugira ubuzima bwiza. Tugiye kurebera hamwe ibintu 5 by’ingenzi ukwiye kwitaho ngo ugire ubuzima bwiza. Ibi bintu umuntu wese akwiye kubyitaho kugira ngo ubuzima bwe bugende neza, kandi bugire icyerekezo kizima.
1. Kwita ku mubiri wawe!
Umubiri w’umuntu ukeneye kwitabwaho kugira ngo agire ubuzima bwiza. Rero, jya wiyitaho, wite ku mubiri wawe. Hari ibintu by’ingenzi ukwiye kwitaho:
- Imirire myiza: Kurya neza, ukarya amafunguro afite intungamubiri (indyo yuzuye), ukagabanya amavuta n’isukari ndetse n’umunyu; ukarya imbuto, imboga, n’ibindi mbese ukiyitaho ukarya ibyo kurya bihagije kandi bifite isuku.
- Gukora Siporo: Ibi bikunda kunanira benshi ariko nibura buri munsi wakagombye gufata iminota 30 yo gukora imyitozo ngororamubiri. Ibi bizakurinda kandi bizagufasha kugira ubuzima bwiza;
- Kuruhuka bihagije: Ntukinanize jya uruhuka. Umuntu yakagombye kuruhuka nibura amasaha 7–8 agasinzira kandi nijoro, burya iyo uryamye ku manywa ntabwo uba uruhutse neza. Rero jya uruhuka bihagije.
- Kujya kwisuzumisha ngo urebe uko uhagaze: Byakabaye byiza ugiye kwa muganga kenshi, n’ubwo waba wumva nta kibazo ufite ariko ukajya kureba uko uhagaze.
Ukwiye kwita ku mubiri wawe buri gihe kugira ngo ugire ubuzima bwiza.
2. Kwita ku buzima bwo mu mutwe
Ubuzima bwo mu mutwe bugira ingaruka zikomeye mu mibereho ya muntu. Rero ugomba kwita ku buzima bwawe bwo mu mutwe kugira ngo ugire ubuzima bwiza. Hari ibintu wakora ngo ubungabunge ubuzima bwo mu mutwe:
- Jya ufata umwanya wo gutuza no gutekereza (meditation).
- Irinde ibintu byagutera stress ahubwo ujye ushaka igihe cyo kwishimisha (usohoke, ujye gusura inshuti zawe, ujye gusenga etc…).
- Igihe ubonye ibimenyetso by’agahinda cyangwa kwiheba, ukagira stress cyangwa amarangamutima yawe agahinduka cyane (ashobora kugabanuka cyane cyangwa akiyongera cyane), jya ushaka ubufasha bwihuse wenda ku nshuti zawe cyangwa ku muryango wawe, nibiba byiza ujye kwa muganga.
Ubuzima bwo mu mutwe ukwiye kubwitaho cyane kugira ngo ugire ubuzima bwiza.
3. Kugira imibanire myiza n’abandi
Abantu ubana nabo., inshuti zawe ndetse n’umuryango wawe nibo soko y’ibyishimo byawe ndetse baragufasha iyo uri mu bihe bikugoye. Iyo uri mu byishimo bishimana nawe waba uri mu byago bakagufasha. Rero mu buzima uba ugomba kubitaho ukabana na bo neza. Ujye ugerageza kwirinda kugirana amakimbirane na bo ndetse umenye gusaba imbabazi mu gihe wakosheje tutibagiwe no kumenya kuzitanga. Ubuzima bwawe bugenda neza iyo ubanye neza n’abandi bituma wumva uri umuntu ufite agaciro ndetse bigatuma ugira ibyishimo mu buzima bwawe.
4. Gukoresha no gucunga neza umutungo wawe neza
Ubundi iyo ugira ibibazo by’amafaranga bishobora kuguteza stress. Amafaranga ari mu bintu bituma umuntu atekereza cyane iyo utayakoresheje neza, bikagutera ibitekerezo byinshi. Kugira ngo wirinde ibi bibazo, ukwiye kujya uteganya ibikorwa uzakoresha amafaranga yawe noneho wayabona ukareba iby’ingenzi muri bimwe wateganyije ukabiheraho ubikora. Ujye wizigamira ndetse ukunde no gushaka ubwishingizi wenda nk’ubwishingizi bwo kwivuza, ubw’umutungo runaka nk’inzu, imodoka n’indi mitungo yawe kugira ngo nugira ikibazo bizagufashe. Ikindi ukwiye kwirinda amadeni y’imfabusa ndetse ukirinda no gupfusha ubusa amafaranga. Ibi bizagufasha kugira ubuzima bwiza.
5. Gushyira imbere imyemerere n’indangagaciro
Tuvuze Ibintu 5 by’ingenzi ukwiye kwitaho ngo ugire ubuzima bwiza, ntabwo twakwibagirwa imyemerere yawe, yaba ishingiye ku idini, imyemerere y’ubuzima, cyangwa indangagaciro zawe bwite, kuko ni yo ituma ugira icyerekezo cy’ubuzima. Imyizerere yawe, ibyo wemera ndetse n’indangagaciro zikuranga bigira uruhare rukomeye mu buzima bwawe bwa buri munsi. Bityo, umuntu aba akwiye gushyira imbere ibikorwa bigaragaza indangagaciro zikwiye kumuranga mu buzima bwe bwa buri munsi, kandi ibyo wemera cyangwa se ibyo wizera bikaguha kubaha abandi no kubana na bo neza, ibikorwa byawe bikagaragaza uwo uri we ariko ntibibangamire n’umwe. Imyizerere yawe ntikwiye kubangamira umuntu uwariwe wese.
Muri rusange, kugira ubuzima bwiza biraharanirwa, jya wita ku buzima bwawe, wite ku mubiri wawe, uruhuke bihagije, ubane neza n’abandi ndetse ubeho mu buzima bufite intego. Ibi bizagufasha kugira ubuzima bwiza.
Ndagira ngo nkwibutse ko ushobora gukorera amafaranga usharinga izi nkuru zacu. Ntakindi bisaba ni ugukora account kuri iyi website yacu maze ukajya ushobora gusharinga inkuru tukakwishyura.
Murakoze!
